W.A.U.
Wasi Afe Usegfunge (HA!)
(Usschnitt)
100% vo dene, wo säge, si gäbe immer 200%, chöi nid prozänträchne.
1 Million Sekunde si 11 Täg. 1 Milliarde Sekunde si 31 Jahr. Numesozumsäge.
Aasichtssach So wie dus gsehsch, gsehschs nume du.
Ballön si wie Lüt. Wesi aut wärde, schrumple si u när göh si langsam zBode. Drum gits die aube am Geburtstag. Aus Reminder.
Date Zersch i Chino, när ga ässe. Wüu öppis zrede.
Ehrlech gseit isch meischtens gloge.
Emotione si zGliiche wi Gfüeu, eifach im Fernseh.
Frömd ischme meischtens, für di Meischte u fasch überau.
Iiwurf Dass dr Ball vorem Iiwurf immer zersch muess abtröchnet wärde, ligt am Söifer, woner vorhär derdüür gsöörft isch.
Itz isch aues, wo zeut, aber oscho wieder vrbii.
Je … deschto. Je intressanter sech öpper säuber fingt, desto weniger stimmts. Geit o mit schön, intelligänt u luschtig.
Kontrolle isch wie di grossi Liebi. Weme se probiert zphaute, ischme se scho am verliere.
Lava Lampe wärde ke Chemp, wemese abschteut.
Mache isch besser aus meine.
Musig Vo denn aa, wome ke neui Musig meh lost, faht me aa zschtärbe.
Neu chunnt vo mache, nid vo choufe.
One Size fits nid all.
Pickel Am Tag, wo dis letschte Bibeli usdrücksch, rütscht dr Pfrisuur ufe Rügge.
Porno isch wie angerne Lüt bim Wermissell ässe zueluege, bisme ke Luscht me het uf Wermissell.
Rageete gö immer. Vorauem statt Blueme. Oder Alk.
Räntiert Zuelose. (U Zähnputze.)
Redefreiheit Bi Lüt, wo säge, was si dänke, schteit ds Dänke nid immer im Vordergrund.
Schlaafe Weme zäme schlaaft, schlaaft me gar nid.
Schlüssle Wemese geng am gliche Ort häretuet, muesmese nie sueche. Git o für Zähn & Grossching.
Socke göh nie verlore, wemese vorem Wäsche zämenääit.
Tagebuech isch wie ohni Deo use. Me machts zum Abstand überchoo.
Tod Aues, wome zrugglaht, isch i de Chöpf vo dene, wome mitne ztüe het gha. Me chas aber o nid beiiflusse, weme no läbt.
Verschtah chunnt vor Rede. Usser im Alphabet.
Verbii Sig nid truurig, dases vrbii isch. Sig froh, ischs passiert.
Wasme uselaht, wird eim ineglah. Wasme wäg git, chunnt zrugg.
Widersprüch heisse so, wüu si geng wider chöme.
Xund Nüt miteme Biudschirm vorem Znüni u nachem Znacht.
Zletschte Mau chunnt unaagmäudet. Me gsehts nid choo u me merkt nidemau, wenns isch. Es isch wie meischtens: Me weisses ersch när.
Zschlimmschte isch, dasmesech dra gwahnet.
Lektorat: Anna Engler
Gestaltung: Weicher Umbruch
Foto: Oliver Nanzig
Atelieer Edition
2021
Merch für die “2050” Tour, vergriffen
