Porno
Schmuddel-Heftchen, hergestellt für den Verkauf bei den “Märli für Erwachsene” Lesungen.
Mit Parental Advisory-Verschluss, Glüschteler-Promo, Centerfold-Poster und allem, was dazugehört. Ausser Porno.
Im Gegenteil: das war ein geschickt eingefädeltes Manöver gegen Kindertische an Familenfesten. Wie sich im Heftinnern dann schon zu Beginn der Geschichte schnell zeigte:
Porno (Usschnitt)
Sodeli: inegheit!
Das Büechli het nämlech hinge u vore nüt mit füdiblutt zäme schabernäckle ztüe. Im Gägeteil: Es isch es Chinderbüechli! U zwar eis mitme chliine Bäremani, wo Anita heisst u uf sire Ungerschrifte-Sammligs-Reis komische Seich erläbt. Es Road-Märli, sozäge. Für Ching, wo mängisch gnue hei vom Ching sii.
U wenn itz lieber nid möchtsch fruschtriert sii, wäge dim schtupid verblaasene Chole, suechschdr es Ching, wo kennsch, u verzeuschim das Gschichtli.
Das hiuft.
Auso. Itz geit’s los!
Anita? Sooone Seich! Aus Bär wott me Jeff heisse, oder wenigschtens Urs oder eso. Aber sicher nid Anita. Langsam heter gnue gha. Gnue vo sim doofe Vorname u ersch rächt gnue vo däm eewige Ching sii. Drum het dr Anita e Petition lanciert:
Schluss mit dem Kindertisch!
het er ufnes Papiir gschribe u ungedraa so Linie gmacht. Zum Ungerschribe. Dr Anita het nämlech aube, we’s es Familiefescht gäh het oder imene Restoraa oder so , immer zäme mit de angere Ching müesse amene seperate Tisch sitze. U das het er überhoupt nid luschtig gfunge. U wener scho grad isch dranne gsii, heter dänkt chömm da no grad echli meh Züüg wome müesst ändere uf die Petition:
Lohn in der Krippe!
Richtige Bagger in den Sandkasten!
Ferien vom Spielen!
Schluss mit lächerlichen Vornamen!
Solarstrom statt immer diese Batterien!
Mehr Ausrufezeichen.
Jawoll!!!!!!!
Berndeutsch / 12 Seiten, 1 Center-Fold-Poster, diverse Illustrationen / Softcover, 13 x 17 cm
Text: Reeto von Gunten
Illustrationen: Mira Tschäni & Michael Husmann Tschäni
Lektorat: Anna Engler
1. Auflage, © 2003 Eigenverlag, vergriffen
Hintergrundbild: aus Madonnas Schmuddelbuch
